اهلاً بالجميع كلن بإسمه ^^
ندخل في الموضوع عشان ماعندنا وقت + أكتب وأنا بالدوام
اللحظة الي قررت أشتري فيها لنفسي ( طابعة )
كانت لحظة صعبة -_-" !!
تايهة ضايعة مدري شسالفة ولا وش مفروض اشتري ولا كيف ولا وش أبي اساساً
فقلت لازم أنقذ نفسي لان محد بينقذني D=
وسويت سيرش مكثف حول الموضوع واخذت فكرة عن الطابعات وسالفتها كلها
وحطيت المعلومات الي عندي بالسناب <~ ومجتهدة وانسق وحالة واخر شيء لازالوا يسألوني عنها ف قلت مابدهاش لازم توثيق للموضوع + يمكن يجوون ناس زي حالتي يسوون سيرش ويلاقون معلومات مختصرة ويقدرون يشترون ( طابعتهم الحلم )
يلا بسم الله :
لحظة قبل الحماس حقي والإندماج ، أحب أنوه على التالي :
* ماعندي خبرة كبيرة بالموضوع ، هذا فقط حصيلة جهد شخصي !
* حتى بعد هذه المعلومات الأفضل تفكرون وتحللون وتبحثون لين تختارون الشيء الصح
اتفقنا ! يلا أجل نبدأ نسولف :
في البداية :
الطابعات الموجودة للإستخدام المعروف والدائم مختصرة بنوعين :
- النوع الأول ( طابعة نافثة للحبر )
وهي الطابعات الي قديمة ماغيرها الي نستخدمها بالبيوت والي تسمع صوت الطباعة ءءء تجك ءء تجك < يشبه كذا ههههههههه
فكرتها إنها : تنفث او ترش نقط صغيرة جدا من الحبر السائل على الورق بسرعة كبيرة وبكذا تطلع الاوراق مطبوعة ، حلو !
وعشان تميزونها اسمها بالانقلش ( inkjet ) ابد اذا شفتوا هالإسم اعرفوا انها النوع الأول البسيط .
وش الزين بهالنوع الأول :
1. سعرها غالباً رخيص ومعقول ومناسب يعني من 500 ريال ونازل .
2. حجمها متوسط وخفيف نوعاً ما لأن استعمالاتها محددة .
3. جودة طباعتها تعتبر ممتازة ، تُظهر الألوان والصور بشكل جيد إلى ممتاز " يفي بالغرض " .
4. بعض من هالأنواع مدلعكم وفيها وظائف أخرى غير الطباعة فقط ( فاكس ، واي فاي ، يو اس بي والخ ) .
5. اسعار الحبر الخاص بها لإعاد تعبئته غالباً " رخيص وغير مكلف " .
فيها سلبيات ؟
ممم ومين كامل دخيلكم ههههههه لا صدق أكيد كل شيء فيه هاه هاه شوي اشياء ماش
ممكن نقول أبرز سلبية يشتكون منها :
( اعادة تعبئة الأحبار بشكل مستمر لانها تخلص بسرعة + احياناً كثير الأحبار تنشف )
<- أنا عني ماشوفها مشكلة ضخمة طالما سعر الحبر رخيص فبستبدل وش وراي !
مين تناسبه هالنوع الأول من الطابعات ؟
- المنازل والأفراد و الي إستخدامهم شخصي وخفيف وبرضو المكاتب الصغيرة الي مايحتاجون فيها إلا طباعة قليلة
يعني نقدر نقول ياخذونها الي ماعندهم عمل كبير جداً واستهلاك قوي للطابعة ، اشوفها حليوة صراحة للأفراد والطلاب وكذا
الآن ، بحط لكم اقتراحات لطابعات ممتازة من هالنوع وبما إن في أنواع كثيرة بحط معيار للبحث حقي :
* سعرها معقول ورخيص 500 ريال فأقل .
* فيها ميزة الـ ( WiFi ) عشان أستفيد منها في الطباعة من الجوال مباشرة .
* سعر الحبر الخاص فيها ايضاً رخيص ومتوفر .
* تكون متوفرة بأغلب المدن واغلب المحلات .
تمام ! هذه معاييري أنا لذلك الاقتراحات بتكون توافق هذه النقاط الي احتاجها ، حلو ! يلا
النوع : ( نافثة للحبر - inkjet )
الحجم : متوسط
المميزات : ماسح ضوئي - واي فاي - طباعة على الوجهين يدوي- ورق عادي
نوع الورق : ورق عادي + أظرف
سعر الحبر : 35 الى 40 ريال
توفرها : جرير
السعر : 189 ريال
النوع : ( نافثة للحبر - inkjet )
الحجم : متوسط
المميزات : ماسح ضوئي - واي فاي - طباعة على الوجهين تلقائي
نوع الورق : ورق عادي + ورق صور + ملصقات + بطاقات + أظرف
سعر الحبر : 65 الى 99 ريال
توفرها : جرير
السعر : 199 ريال
الحجم : صغير
المميزات : ماسح ضوئي - واي فاي - طباعة على الوجهين يدوي + تطبيق خاص لها بالجوال
نوع الورق : ورق عادي + ورق صور + ورق لامع + أظرف
سعر الحبر : 35 الى 45 ريال
توفرها : جرير
السعر : 299 ريال
deskjet,4675,إتش بي
الحجم : كبير
المميزات : ماسح ضوئي - واي فاي - طباعة على الوجهين تلقائي + تطبيق خاص لها بالجوال + فاكس
نوع الورق : ورق عادي + ورق صور
سعر الحبر : 35 الى 45 ريال
توفرها : جرير
السعر : 419 ريال
حلوين خلصنا الحين النوع الأول ، واخترت أبرز وأفضل الاقتراحات ، في موقع جرير وغيره في أنواع آخرى كثير ولكن غير المعايير الي حطيتها أنا ، يعني مثلاً في وحدة رخيصة وكويسة بس مافيها واي فاي ! وأنا يهمني الواي فاي لذلك ممكن تبحثون أكثر وتشوفون الي يناسب معاييركم ، اوكِ ؟
*********************
- النوع الثاني ( طابعة الليزر )
وهي الطابعات الأجدد والحديثة ومتطورة أكثر وماتطلع صوت ءءء البطيء p=
فكرتها إنها : شعاع ليزر يتحرك بسرعة عالية على الورق فتكون بجودة ووضوح ممتاز .
اسمها بالانقلش ( Laser printer )
وش الزين بهالنوع الثاني :
1. أكثر شيء يميزها السرعة العالية ، يعني تطبع كثير أوراق في ثواني معدودة .
2. جودة الطباعة الممتازة ، يعني الصور تشوفون ألوانها ودقتها بشكل جداً جميل ومافيها تطبُع زي الحبر .
3. تكلفة تشغيلها أقل من النوع الأول ، وشلون يعني ؟ هي سعرها كجهاز تشترونه لأول مره " غالي " حلو ! لكن كإعادة تشغيل وتعبئة حبر تعتبر أوفر لأن حبرها كبير ومختلف ويقعر فترة طويلة مايقارب السنة ! " على حسب الإستخدام "
4. متعددة الوظائف ، مره تدلع الواحد ومريحة بشكل كبير لأنها توفر كثير شغلات .
فيها سلبيات ؟
يمكن يعيبها سعر الخراطيش < هههههههههه كان يمديني أكتب التعبئة او الحبر بس يونس اسم خرطوشة ههههههه
المهم يعيبها أنه سعرها غالي ومافيش فلوس ياحبيبي مافيش فلوس هههههههههه خلاص بتكلم جدياً
العيب الثاني من عندي انا شخصياً : مرره كبيرة وثقيلة وتاخذ مساحة بس تفداها الاماكن والمساحات لأنها كفو
مين تناسبه هالنوع الأول من الطابعات ؟
الشركات والمكاتب الكبيرة والي إستخدامهم عنيف زي الي عندهم بحوث وحالتهم حاله ههههههههه
يعني بالعربي كذا حقت كرف وصبر وطباعة ليل ونهار بدون رحمة هههههه
وطبعاً الي عنده فلوس زايدة أصرف له يحطها بطابعة ليزر صراحة حتى لو للبيت
الآن ، بحط لكم اقتراحات لطابعات ليزر ممتازة من هالنوع وبما إن في أنواع كثيرة بحط معيار للبحث حقي :
* سعرها معقول ومناسب 500 ريال فأعلى .
* فيها مميزات ووظائف متعددة .
* سعر الحبر الخاص فيها ايضاً مناسب ومتوفر .
* تكون متوفرة بأغلب المدن واغلب المحلات .
تمام ! هذه معاييري أنا لذلك الاقتراحات بتكون توافق هذه النقاط الي احتاجها ، حلو ! يلا
الحجم : كبير
المميزات : ماسح ضوئي - واي فاي - طباعة على الوجهين يدوي + طباعة الكترونية + تشغل/إغلاق تلقائي + قياس الطباعة + منفذ USB
نوع الورق : ورق (ليزر، عادي، صور، خشن، متين) + أظرف+ بطاقات لاصقة + ورق مقوى + بطاقات بريدية
حجم الورق : A4 ، A5 ، A6 ، B5
توفرها : جرير
سعر الحبر : 250 الى 290 ريال
السعر : 479 ريال
الحجم : كبير
المميزات : ماسح ضوئي بالألوان - نسخ - واي فاي - طباعة على الوجهين يدوي + طباعة الكترونية + شاشة باللمس
نوع الورق : ورق عادي + أظرف+ شفافيات + ورق مقوى + ملصقات
حجم الورق : A4 ، A5 ، B5
توفرها : جرير
سعر الحبر : 220 الى 250 ريال
السعر : 799 ريال
الحجم : كبير
المميزات : ماسح ضوئي - نسخ - واي فاي - طباعة على الوجهين تلقائي - طباعة الكترونية - تشغل/إغلاق تلقائي - قياس الطباعة - منفذ USB - شاشة لمس ملونة
نوع الورق : ورق (ليزر، عادي، صور، خشن، متين) + أظرف+ بطاقات لاصقة + ورق مقوى + بطاقات بريدية
حجم الورق : B6 ، A4 ، A5 ، A6 ، B5
توفرها : جرير
سعر الحبر : 290 الى 350 ريال
السعر : 1399 ريال
( هذه عندي ومجربتها حول السنة ، عملية وتخدم وذكية جداً أحب هالأجهزة الي تسهل الحياة ، طباعتها للورق فاخرة ، اجمل خدمة هي أني احط اليو اس بي واطبع منه مباشرة أو من الجوال أو من الشاشة أدخل صفحة الويب ، وبطلة صراحة ، مشكلتها كبيرة وضخمة وثقيييلة عارفين كم وزنها ؟ 16 كيلو !! ، بس تستاهل الثقيلة حقت كرف )
ملاحظات وتنبيهات :
* كل الطابعات الجديدة من كلا النوعين فيها واي فاي فبالتالي تطبع من الجوال مباشرة .
* إذا تبغون طابعة صور "فقططط" لاتاخذون الي ذكرناه لأنه ماراح يفيدكم ، خذوا شيء مخصص للصور .
* قبل الشراء شوفوا أسعار الأحبار اذا تناسبكم كل فترة تشترون منها أو لا .
* يُفضل تشترون الطابعات من أماكن يكون لها وكيل وضمان عشان ماتتوهقون مستقبلا .
وبس والله !
خلاص ؟ وش تنتظرون ! روحوا اشتروا يلا هههههههههه
لا صدق هذه أهم المعلومات ، ترا مو لازم هرج كثير عشان أسهل لكم المهمة حاولوا تحددون وش تبون بالضبط !
اذا عرفتوا احتياجكم خلاص إنحلت ، كمان افهموا الوظايف الي تقدمها كل طابعة وشوفوا الاساسيات يعني
نصيحتي أنا حتى لو ماطلبتوها :
لو عندكم دوام وتحتاجون طباعة اوراق بس وشغلات بسيطة وفلوسكم ع قدكم أحسن شيء الطابعات العادية أول نوع
أما لو عشرين نفر بالبيت سوو قطة واشتروا ليزر هههههههه
أرجع أقول ابحثوا أكثر عشان ماتشترون إلا وانتم متأكدين من إختياركم ، اوقيه ؟
يلا إن شاء الله يكون بوست محترم ذو قيمة يفيد الأجيال ، وتشترون كلكم طابعات ومحد يرسل لي سناب عنهم ، إلى اللقاء
انا ابا افتح مشروع تصميم دفاتر بس م اعرف ايش الطابعة اللي تناسب مشروعي وايش نوع الورق المناسب بس اسمع عن ورق غلاف يجي مقاوم للماء بس م اعرف ايش الطابعة اللي تناسب هذا الورق اذااا ممكن ساعدوني بلييييز
ردحذف